路上行人欲斷魂

 

前日 13 號黑色星期五 , 整體氣氛配合劇情需要 , 由早上落雨 , 落到下午

在送埋老友最後一程上山到火葬場的路上 , 由於太旺場 , 在山坡靈車上等了差不多兩個鐘 , 始能排隊進入火葬場 , 禮堂附近同酒樓等位情況差不多 , 要攞飛等入場做最後之禮拜儀式 .....

呢一兩年 , 我已送左三位近 40 年交情既老友走了 , 經驗豐富 , 已經無乜傷感 , 反而是覺得應份了 , 幾十年交情 , 就真係如同眨眼一樣 , 兩秒鐘已經在腦海裡 play back 晒 , 跟做戲一樣 , 悲喜交雜 , 不懂形容

該問既就真係 ...為乜 ? 

平衡宇宙咁大 , 點解咁多人你唔碰上 , 偏偏碰上呢幾個人 , 呢幾個人又真係偏偏同你既 blockchain 掛左鉤 , 脫不得 ....直到大家輪流消失

其實 , 其他既關係 , 現今我都尚在時刻地重現緊 , 兩三段前緣若果無改到的話 , 延續到今天既處境經常都仍然出現在我腦海裡 , 即係 ...生命既可能性係同一時間發生緊的 , 你最終其實沒有選擇 , 而係無論你點揀 , 多重宇宙裡 , 多種選擇同時發生 

一個人已經有咁多個平衡宇宙 , 世界上有咁多人 , 點樣去處理呢種多維空間既系統 , 其實先係我既問號 , 以我暫時既智慧 , 我答唔到 

既然答唔到 , 倒不如倒頭大睡也罷 , 畢竟 , 我已去到生命既 0.786 , 差不多係時候要體驗下呢個平衡宇宙系統了 

Better Sleep well while it rain 

https://www.youtube.com/watch?v=LYkOG5OmUcA

Yam