與君一席話

歐洲和美國分別出現兩則唔起眼嘅新聞：歐盟打算規管AI，將被視為高風險行為嘅AI應用規管，「不能接納」嘅禁止；美國政壇元老基辛格同Google前執行主席Eric Schmidt合著一本書Age of AI，講AI對人類未來嘅影響，重點係講AI競賽會觸發美中矛盾，以圖重新包裝一個舊議題。

上述兩單新聞，喺股票市場冇人關注。因為人工智能早已經成為成功企業生意嘅一部份。大約早一至兩年，人工智能仍然係一個股票嘅賣點，到現時，幾乎所有軟件股都同人工智能有關，好難真正定義一隻股票為人工智能股：譬如Nike（NKE）及麥當勞（MCD），都有使用人工智能，但係我哋好難話佢係人工智能股。對比起兩年前，只要稍為提及公司有用人工智能，股民就好似原始人見到火一樣，覺得件事好新奇。

當年Alpha Go逐個圍棋大師捉贏，大家開始認為人工智能將會取代人腦，發展到今日，Siri最叻嘅說話就係「對唔住，呢樣嘢我答你唔到」，人工智能仍然未能取代人類，喺回答老細呢種答案時，會俾人一個File車埋去嘅功用，又或者係因為部MacBook太貴，所以救番人工智能一命。

人工智能發展到而家，比起開始嘅時候有更清晰嘅目標：將勞動力密集嘅工序簡化由人工智能做。人工智能最初嘅其中一個應用層面，就係網上交易太多太快，初創企業勞動力同埋層級都無法同傳統銀行相比，去應付審查虛假交易嘅能力，結果就開發審查嘅軟件功能，亦都係人工智能嘅雛形，現時有個別嘅美股，都係透過類似嘅人工智能能力，去進行貸款審查。而係繁瑣而又重複嘅工序上邊，人工智能做得比人類快，成本輕，甚至可以話更加準確。

事實上，大家可能會問，點解冇人發明人工智能炒股？相信已經有人發明咗，真正嘅問題應該係點解人工智能炒股創造唔到另一個畢菲特？

有間網上代理Zillow（ZG）2019年12月推出Zillow Offers，簡單來講就係自己坐埋盤，有人想買盤佢自己買，然之後翻新，賣返去比另一個買家賺差價，美國稱之為iBuying，大概等於你想經紀網站，見到自己個盤，撳個掣，跟住經紀行打電話俾你話出價。曾經寫過無數篇文講過，疫情後嘅美國樓市，升幅遠遠強過香港樓市，係呢個時候推出坐盤交易業務，冇可能輸。結果Zillow 11月初公布嘅業績，宣布關閉呢個部門，並且裁減25%人手。

網上AI代理無功而回

Zillow擁有龐大數據分析樓市，如意算盤係用人工智能大概推算同區樓盤嘅估值，如果有人想出售，用數據分析計價再派員上門調查間屋，然後出價。其中一個賣家事後話佢個盤比其他經紀行出㗎貴咗10萬美元，所以佢賣咗畀Zillow。至於佢係衰乜？咪就係好嘅盤就會收起自用或等升值更多，真正願意賣畀你嘅，係市場上質素較差嘅盤，數據平均睇唔到嘅折讓，結果坐盤交易變成坐貨交易，人工智能慘被業主喺制度上屈機。

可能係將大部份數據分析同整合上面，人工智能係有佢嘅先進性，甚至乎未來根本唔需要請分析員寫大行報告，業績一出人工智能自行可以產生一份更精密嘅股票報告。但去到市場交易上，人工智能嘅根本問題係，炒股嗰舊錢唔係人工智能賺返嚟，就算係佢賺返嚟，都唔係人工智能擁有並且享用，就算現時世上嘅人工智能真係有感情，已經懂得思考，但係佢炒嘅係你嘅錢，投入度已經大打節扣，仲要冇出糧畀佢，點會有心機幫你炒？

應用得人工智能，無非為慳密集人力成本，件工具本來請返嚟24/7做流水作業，本身已經白做，你畀份身家舞，畀咗一次機會佢復仇，智能叛變咪係咁解囉！

--------------------------------------------------------------------------------------------------------------

現在好多人沉迷於 AI trading ...又或引入 algorithm 去設計一些 trading 既方法 , 希望能夠打敗市場 , 又或戰勝庄家 

坦白講 , 如果你睇過我果篇 [ 即市道指分鐘轉勢 ]  post 的話 , 而又明白市場既真諦 , 就會對所謂 AI trading 冀望減輕了 , 何解 ?

整個市場 , 去到分形最細既時候 ( 分鐘圖係普遍一般用家所用到最細時間窗 , 當然仲有 tick 圖 ) 係有無形之手 , 等時間到 , 跟住數倉 , 依照市場人仕做好做淡既多寡去 [ 殺倉 ] , 將市場驅動到小數既一邊 .....呢個有心人既行為 , 係一日有庄家維持秩序都唔會改既行為 , 亦即賭場內之大數理論或然率驅使出既 [ 行為 ] 標準

http://yamgroup2013.blogspot.com/2021/10/dow-1-mins-chart-28-oct-2021-forecast.html

就當你寫既 AI 演算跟到邊分鐘 [ 數倉 ] , 你既參與度亦會被算入 [ 數倉 ] 行為當中 , 變成受害者 , 你既參與程度越高 , 被算入歸邊既行為越深 , 試問 , 就算你彌定到邊分鐘轉勢 / 數倉 , 你點樣將自己既參與度剔出 , 造就自己成為有利既小眾呢 ?

同樣 , 以 [ 轉勢日 ] 為標準作買賣既市場參與者 , 每每於 [ 轉勢日 ] 到 , 就會被 [ 數倉 ]  .....咁 , 你點樣可以成為小眾 , 不被獵殺既同時 , 可以反敗為勝地有利潤 , 已經成為你要研究既重點課題 !!!

方法有兩 ....

第一 , 永遠唔好同人講幾時轉勢 , 務求令自己成為小眾一份子

第二 .....跟庄家一樣 , 加權平均持倉 averaging .....將戰場拉濶 ....

Yam